60 lokal nga mag-uuma, nakadawat ug tag-10 ka Muscovy ducks gikan sa DA SAAD, Mayor Salarda gipahinumduman ang katawhan na sundon ang minimum health standards batuk COVID-19

60 lokal nga mag-uuma, nakadawat ug tag-10 ka Muscovy ducks gikan sa DA SAAD, Mayor Salarda gipahinumduman ang katawhan na sundon ang minimum health standards batuk COVID-19

PAG-ASA, Alabel (Agosto 15, 2020) – Dugang 60 ka lokal nga mag-uuma sa Barangay Pag-asa ang nakadawat ug tagpulo (10) ka Muscovy ducks kun pato gikan sa Department of Agriculture ilalom sa Special Area for Agricultural Development (SAAD) Program, Sabado sa hapon, Agosto 15, 2020. Nahitabo ang maong distribusyon sa Brgy. Pag-asa Covered Court.

Gikalipay pag-ayo sa mga benepisyaryo ang nadawat nilang mga pato isip tabang sa nasudnon nga panggamhanan pinaagi usab sa suporta ug kooperasyon sa Lokal nga Panggamhanan sa Alabel nga gidumalaan karon ni Municipal Mayor Vic Paul Molina Salarda, MPA.

Sa mensahe ni Mayor Salarda ngadto sa mga mag-uuma, iyang gipahinumduman ang atong mga kaigsuonang mag-uuma nga ang tanan nga mga hinabang gikan sa gobyerno. “Wala nay laing gobyerno, mao ang gobyerno sa Pilipinas, usa ra ang atong gobyerno,” sigun sa mayor ug gihatag niyang empasis nga usa ra ang gobyerno sa nasud Pilipinas.

Matud pa sa alkalde nga kinahanglan palambuon sa mga benepisyaryo ang maong hinabang aron dili mapakyas ug mahulog sa wala ang mga gigahin sa gobyerno alang sa ila.

Mahibaloan nga sunod-sunod ang hinabang nga gibubo sa Department of Agriculture sa lungsod sa Alabel ilalom sa SAAD Program sa maong ahensya. Ang atong mga kaigsuonan nga mag-uuma sa mga kabukiran nakadawat ug mga similya sa upland rice, OVP Corn, mga organiko nga abuno (fertilizers), mga kanding, kabayo, corn sheller, ug mga pato tung milabayng mga bulan.

Ang Lokal nga Panggamhanan sa Alabel nga gipanguluhan ni Mayor Vic Paul Salarda, MPA padayon sa pagpahinumdum sa tanang Alabelians, nga makanunayong tumanon ang tanang guidelines subay sa minimum health standards ug protocol sa IATF-DOH ug ang atong lokal nga Incident Management Team.

“Dili ninyo kalimtan ang pagsul-ob ug facemask, [pag-obserba] sa social distancing, paghugas ug mga ,kamot…kung mahimo ug kung dili importante ayaw sa mug adto sa [gawas] sa lungsod,” sigun pa ni Mayor Salarda.

Naghatag usab ug mensahe si Police Major Roy D Yasay, labaw sa Alabel Municipal Police Station, kabahin sa ginapatuman nga mandato sa gobyerno nga may kalabutan sa crime prevention, seguridad sa katawhan ug mga existing health protocol.

Ang maong aktibidad sa DA kauban ang lokal nga panggamhanan usa ka halimbawa nga nagpakabana ang gobyerno sa iyang katawhan.

Ang mga programa sa sector sa agrikultura sama niini, dako ang matabang aron makab-ot sa lungsod sa Alabel ang ginatawag nga Food Security. Kung mamahimong igo ug malungtaron ang maong mga hinabang, dili madugay mamahimo realidad ang maong tumong.

Ang 5K Masaganang Alabel Program (5K MAP), flagship convergence Program ni Mayor Vic Paul M. Salarda, MPA maoy pagpatuman sa mga programa kaabag ang National government agencies nga may kalabutan sa livelihood (panginabuhian), pagpanguma (farming), pagpangisda (fishery), ug pag-alimag mga kahayupan (animal husbandry). Ginasugdan na usab sa Masaganang Alabel Team ang pagsurvey sa mga organic ug backyard garden sa lungsod isip vegetable suppliers sa BLT Kitchen sa munisipyo, nga maoy tigluto sa mga sud-an alang sa mga frontliners ug mga quarantine/isolated individuals.

Misalmut usab sa maong aktibidad sa SAAD, ang mga personahe sa Office of Municipal Agriculturist, SAAD Coordinator Engr. Jayman B. Acojedo, ug si Punong Barangay Rose Mae Salway Orlino. (ALABEL INFORMATION OFFICE)

#SmileAlabel
#MasaganangAlabel
#SerbisyongMayMalasakit
#SerbisyongSMILE #Kabuhayan
#FoodSecurity #FoodAvailability
#WorkingAIO