DSWD Assistance to Individuals in Crisis Situation Pay-out
GIPANGUNAHAN sa Department of Social Welfare and Development (DSWD) ang pagpanghatag og financial assistance ngadto sa mga benepisyaryo sa AICS kun Assistance to Individuals in Crisis Situation sa Munisipyo sa Alabel, Domingo sa buntag, ika- 17 sa Disyembre 2023 sa Alabel Municipal Civic Gymnasium, Barangay Poblacion, Alabel, Sarangani Province.
Misaksi atul sa maong ‘pay-out’ activity sa DSWD sila Municipal Mayor Vic Paul M. Salarda, MPA kauban sila Municipal Administrator Lilibeth “YBing” J. Salarda, MPA ug Engr. Gerald Faciol, chief of staff for operations ni Congressman Steve Chiongbian Solon.
Ang alokasyon sa pondo alang sa maong financial assistance sa 1,000 ka benepisyaryo sumala sa DSWD gikan mismo sa central office sa Department of Social Welfare and Development (DSWD) nga gi- aprobahan ni Secretary Rex Gatchalian.
Nasayran nga mibisita ang kalihim sa probinsya human ang makusog nga linog nga nasinatian sa habagatang bahin sa Mindanao ug usa ang Alabel nga naapektuhan sa maong katalagman.
Sa mensahe, mapasalamaton si Mayor Salarda sa paspas nga aksyon sa DSWD aron mahatagan og hinabang ang Alabel. Gidayeg usab niya ang suporta sa 14th Sangguniang Bayan sa Alabel sa mga programa ug aktibidad alang sa katawhan sa lungsod labi na sa panahon sa mga krisis ug mga katalagman.
Gipasalamatan usab sa alkalde ang Provincial Government sa Sarangani sa pagpanguna ni Governor Rogelio “Ruel” D. Pacquiao, MMPA, ug sa opisina ni Congressman Steve Chiongbian Solon sa paghatag og suporta agi’g mga hinabang sa katawhan sa Alabel nga labing nanginahanglan.
Sumala sa datos gikan sa Alabel Municipal Social Welfare and Development Office (MSWDO), ang 1,000 ka benepisyaryo midawat og tag- Three Thousand Pesos (P 3,000.00) nga financial assistance gikan sa AICS sa DSWD. (ALABEL INFORMATION OFFICE)
Comments
Post a Comment